AKEK PADEK NAN MANDASAK

Oleh Uki Lestari

Oi, Sanak kasadonyo. Tau ndak, apo yang ambo rasoan kini. Apo nan padek, lai ko lah sakunyo nan padek. Tu, apo lo ko lah nan mandasak. Lai indak mandasak ka pai ka lakang ko lah yo. Hihi.

Lai indak do Sanak ka sadonyo. Iko a, di Akek ko, banyak sabananyo rencana nan ka dikarajoan. Tapi, banyak se nan mahalang. Ado se nan ka mambuek bata niek nan lah diancang jauah-jauah hari.

Kok nan mandasaknyo, kiriman untuak tantangan di Gurusiana ko a. Sabananyo, ado stok tulisan agak bara buah ko a. Tapi indak se nak mangirim itu do. Alah babuek nan baru tadi mah. Tapi ati ko mangatoan indak nak mangirim itu. Baa juo lai.

Jadilah ambo bapatatah patitiah sasudah magarik ko. Beluik-beluik muncuang ambo maijo nan ambo tulis ko a. Untuangnyo ambo lai duduak di biliak juo lu. Jadi indak nampak pencang-pencuik muncuang ambo dek urang do.

Paniang ambo kini mah, apo nan ka ambo angkek manjadi tulisan. Kok tantang karajo ambo sahari tadi, alah ambo buek jo tulisan bahaso Indonesia. Tu ndak lamak lo lai do, kok ka diulang jo bahaso awak ko. Bahaso Minang.

Aaa.... Ndak mode itu do Sanak. Baa gak ati jikok ambo maota lamak se sambia maminum kopi . Lai nio Sanak mandanga? Atau mambaconyo? Baco dih! Sudah tu komen dih! Tu agiah lope stek. Tando Sanak yo lah mambaco dan katuju jo nan ambo tulih ko.

Manyabuik soal kopi. Ambo ko tamasuak antu kopi mah Sanak. Antah dek apo lo kolah. Ambo ko taragak bana dek kopi.

Sakiang taragaknyo a, sakik palo ambo kalau ndak dapek kopi ko dalam sahari. Kopi ko, ubek mujarab untuak ambo mah. Untuak pakawan manuang, untuak manonton, untuak duduak-duduak santai jo yayang beb ambo, jo pangawan manulih mode kini ko iyo lo mah.

Pokoknyo kopi ko is de bes bak kecek urang Inggirih nyiin a. Tu kalua bana baso Kotobaru ambo lai nah a.

Biasonyo, dek apak-apak ataupun uda-uda dan adiak-adiak nan laki-laki. Biasonyo pangawan kopi ko jo rokok mah nak. Kok ambo a, paliang jajok bana dek rokok.

Ups, tunggu! Jan naiak insang lu. Nan ambo jajokan tu rokoknyo, indak urang nan marokoknyo do. Uda ambo masih juo marokok mah. Tapi ambo tatek sayang ka balau. Malahan, sayang bana ko a. Ndak pacayo Sanak? Tanyo se lah ka uda ambo tu.

Nan bak gayuang basambuik, uda ambo iyo lo sayang ka ambo. Baa kok baitu? Pede bana ambo mangecek yo?

Biapun uda ambo alum namuah baranti marokok, tapi balau lai manjago juo anak bininyo. Kok ka marokok, balau pai kalua rumah. Marokok baliau di suduik rumah tu. Pokoknyo nan jauah lah dari urang-urang tasayangnyo.

Itu kecek ambo se mah, urang tasayang. antah iyo antah indak bak kecek lagu Minang nan sadang hits kini tu a. Ndak la tau ambo do. Pokoknyo ambo sabuik se lah uda ambo sayang ka ambo. Hihihi.

Baliak ka kopi carito wak liak. Kok soal rokok juo nan dikaji, nyo impok ambo dek apak-apak beko. Manyuruah baranti mangaji soal rokok. Kok jo pitih nyo impok ndak bagai do, ko jo tarompa nan lah putuih lo talinyo. Untuak apo dek ambo tu? Huft!

Jadi, kopi tu yo minuman nan paliang ambo suko. Kok nyampang batamu ambo ka rumah Sanak bisuak, jaan buekan lo ambo jus lai, apolai sup buah. Jaan.... Jaan sampai indak. Ndak ka manulak ambo do. Hahaha.

Buekan se ambo kopi, jadi tu mah. Bia ambo sabuik dari kini. Antah iyo ado masonyo ambo batamu ka rumah Sanak bisuak nak. Sanak buekan lo ambo jus. Tu tapacak-pacak paluah ambo dek kagadangan hati. Haha.

Alah lu dih Sanak. Urang lah azan. Sumbayang awak nan ancak lu nak. Wak sambuang pakan bisuak kok lai diagiah juo umua nan panjang dek Yangkuaso.

Salam kopi itam dari Muaro Paneh dari ambo yo. Baiak untuak Sanak yang lai di kampuang atau Sanak yang jauah di rantau. Mudah-mudahan tulisan ambo ko, paubek ati Sanak nan takana jo kampuang nan jauah di mato. ☕

Solok, 23 Februari 2020.