Testimoni pulang kampuang ka Ranah Minang. Baru tigo ari di kampuang banyak hal-hal yang agak manggalitik ati awak.

Kok di sosial media banyak nan manyuruah katiko pulang kampuang pakai bahaso Minang baliak, lai ba lakuan itu. Kok ado nan ndak mode itu berarti rantaunyo kurang jauh. #berdasakanpengalamannannampakdilapangan

Misalnyo: urang Lima Puluh Kota marantau ka Padang, bahasonyo langsuang batuka. Atau marantau ka Pekanbaru, langsuang batuka bahasonyo.

Malah nan marantau ka Malaysia, Banduang, Jogja, Jakarta, Kalimantan, dan tompek jauah nan beda pulaunyo, bahasonyo masih totok bahaso kampuangnyo.

Salanjuiknyo, sungguah tagolak jo mengelitik, katiko poi balanjo ka pasa, atau boli makanan di topi jalan, lobiah banyak nan pakai bahaso Indonesia yang sekerat ula, sekerat belut. Lawak jadinyo mandongaan, Indonesia jo logat Minang yang kental.

Awak nan lah ba bahaso Minang toruih ko dijawek jo Indonesia Minang ala-ala anak gaul Minang #gaknyo

Atau memang anak mudo Minang ko lah mulai ilang Minangnyo, tingga kobaunyo se.

Ontahlah.

Tolong untuak para influencer, jan manyuruah urang rantau nan baliak ka kampuang se ba bahaso Minang, tapi urang kampung tu lah yang harusnyo lobiah kental bahaso Minangnyo, bangga nyo ba bahaso Minang.

Awak nan lah marantau ba taun-taun ko masih totok bahaso Minangnyo.

Ko nan di kampuang se lah Indonesia Minang bahasonyo.

Jan sampai ilang pulo bahaso Minang asli dek urang kampuang sorang.

Ma ibo jadinyo.

Note: translet silakan hubungi penulisnya langsung.

Lima Puluh Kota, 19 April 2023

22:52