Tantangan Hari Ke 7

#TantanganGurusiana

Ajor Lentak

Pagi ne nak ngantar pelakian kereje muji die masok pagi, karne aku nak ke pasar jadi sekalian la aku ngantar die. Biase se nang aku la nok gawe ngantar kan ngambelek die kereje ne. Kadang ade tika e die mawak mutor sendirik, biase men aku dak kemane-mane die la mawak mutor. Kadang bujang aku men agik rajin e die juak ngantarek bapak e sekalian die ke Tanjong Pendam.

Karne ujan tek, aku pakai jas ujan. Laki aku ne muji die liat dak gilak lebat ujan e, pakai jaket sajak. Jaket ne anti aik kunok e. Ukan base kuk be lebat kini ujan ne, tapi die se dak ngingaan, biarlah uji e. Jadi la rapi tek, pegi la kamek begandeng naik mutor. Singga suat meli nasik uduk Kak May idang pelampunan die, base de ruma tek dak de laok minggak teluk asin sutik.

Uda itu kamek lanjut pulak, dak lamak tule lebat yang ujan tek. Laki aku agak deras mawak mutor e biar cepat sampai tempat kereje e. Pas sampai tempat kereje e jaket die tek la basak. Terus kusuro mukak jaket liat baju e basak ke. Rupe yang baju tek la ajor juak..ini se kan balik aku ngambik baju ganti. Dak kan ade die seari-arian kereje bebaju basak. Jadi.. balik agik aku ke ruma ngambik bajuk ganti die tek. Itula dak nurut la urang sebut pakai la jas ujan, tapi dak nak. Aku tek jadi dak tulai ke pasar, la malas juak. Jadi meli laok sajak la idang bujang aku tek. Dak lupak meli mie instan idang ujan-ujan ne..sedaap..hehehe.