#Tantangan ke-39

Cerita Bahasa Daerah

Lamun teu aya acara poe Saptu teh poe anu ditunggu-tunggu. Nyaeta poe anu bisa niiskeun pikir, nenangkeun hate hate sabab ti Senen nepi ka Jumaah biasa tukang ngasuh budak mah sok asa cape. Hayang ngalempengkeun suku bari diuk andeprok di balandongan tatangga bari naggeuy sangu sapiring, nu di luhureun sangu numpuk rencangna ti lalab nepi ka sambel anu medok ku tarasi. Terus silih geroan hayu urang papahare, pasti tatangga rabul ti dapur sewang-sewangan. Sarua naranggeuy piring.

Tos kumpul ngariung limaan kuring, Ceu Iroh, Ceu Tati, Ceu Irma, sareng Ceu Anah nu gaduh bumi. Sadaya balakecrakan ngahuapkeun sangu bari silih comot deungeuna. Ngan nu sok ngarugikeun gede mah pasti nu boga imah, kudu nyadiakeun cai sateko jeung pasti ngumbah gelas. Ah, tapi tara aral nu aya mah sok ngeunah seuri.

Rengse papahare sok terus ngawangkong dariuk dina dipan nu leucir sabab mindeng dielap ku anderok ibu-ibu nu sok sering ngalanto di imah Ceu Anah. Keur anteng ngawangkong, “Baradeeee!” Ceu Lilis tukang mingguan datang mawa gembolan. “Sok we buka Ceu! Ulah sok nawaran.” Ceu Idah mairan. Teu talangke Ceu Lilis nyetandarkeun motor terus nurunkeun gembolan.

“Aya daster Ceu?” Ceu Tati naros. “Kaleresan aya nembe balanja pisan, ieu seueur warna, lengkep warna MIJIKUHINIU.” Ceu Lilis bari ngaluarkeun daster satambruan. “Aduh mani gaya Ceu siga guru IPA.” Neng Susi nyelengkeung pengkereun bujur kuring. “Nya sakali-kali ngapalkeun deui palajaran jaman baheula.” Bari nyeulukeuteuk seuri.

“Tah leres atuh abdi bade nganjuk hiji, warna ungu kaseneng pun lanceuk.” Saur Ceu Iroh bari milihan.

“Abdi ge hiji atuh, daster mah tiis dianggena, wios tos bolong ge sok betah ari di daster teh.” Ceu Tati mairan.

“Abdi mah ngangge daster kameumeut bapana, ngarah...” “Tuh nya Ceu Anah mah tara diteraskeun da!” Gerrr seuri akey-akeyan.

“Ari Ibu moal kabita?” Ceu Lilis naros ka kuring.

“Ke urang diemut heula nya! Asa minggu kamari pan nyandak hiji, pasti aya keneh hutang abdi ka Euceu.”

“Hah pirage pangaos daster moal ngaleuwihan Brio!” tembal Ceu Lilis.

“Nya ari nu dagang mah pinter pisan iklanna. Pami daster saharga brio mah atuh abdi moal ngangge daster, pan daster teh baju kebanggan kaum istri, ari tos di daster teh dunia asa lega, tiis ceuli herang mata.” Ceuk kuring bari terus nawar.

Ceu Lilis ngasongkeun daster warna beureum kaseneng kuring bari terus gutret nulis dina buku leutik anu sapuratina catetan mingguan.