Sampèr sarong ka bâbâna 

Kalong manè' nyang-kornyangan

Pèkkèr kerrong karobâna

Lorong kènè' panpangongngangan

Ngampar tèker jhâlân nyorot

Ngampar kasor kalama'a

Bulâ nèser maḍḍhâ torot

Mon tapèngsor bârâmma'a

Molong pao ngèbâ dhâmar

Sèngaronḍu' èpetthèghâ

Lakor tao ngala' samar

Maskè nonḍu' èlèrègghâ

Mancèng monḍung neng è taman

Ngennèng sèttong èpanyangsang

Bulâ tèḍung rassa ta'nyaman

Dhika sèttong sè èkaposang

Dhung-bâddhungan sangghu nyèmbhâl

Ta' ao peltè'na lèntè

Jhung-kèjhungan sangghu sabbhâr

Ta' tao sakè'na atè

Bulâ kèng pon abeḍḍhâ'

Mon pèpè  cè' bâccana

Bulâ kèng pon aghellâ'

Mon atè cè' sossana

Pangarana ka Jhâbâ'â

Nganalè'è poter bhâli

Pangarana ta'enḍâ'â

Nganalè'è nèser bhâi

Nyarè kaju ka alas lao'

Ta' nemmo ghâgghârâ jhâtè

Rèng amadu panas perro' 

Ta' nemmo sabbhârâ atè

Ka Sampang mellèya jhâmbhu

Karanjhânga meltassaghi

Ta' ghâmpang dhâdhi rèng bhuḍhu

Salanjhânga mellassaghi

Tèr-kètèran obi manis

Jâng-lajângan ḍâuna nangka

Kèr-pèkkèran sambi nangès 

Jâng-bâjângan sangghu dhika

Sè tèra' lomari kaca

Sè petteng lomari jhâtè

Mon mella' bâḍâ èmata

Mon meddhem bâḍâ é atè

Ngombi' konyè ghâbây jhâmo

Mellé bista ngèbâ arè'

Pong ghi' kènè nyarè èlmo

Lè ta' kasta buḍi arè

Kapal rantè pajikaran

Mano' ngortok ḍâ' tèmorra

Rèng alakè jhâ' tokaran

Ma'lè totok saomorra

Sapa dhika anḍi' tarnya'

leng-èleng lebbhâ' buwâna

Sapa dhika anḍi' ana'

Èdheng-pandheng seḍḍhâ' robâna

Lèkkolègghâ amonyèan

Tanḍhâna pon nambhârâ'â

Palèrègghâ pon bânnèyan

Tanḍhâna para' enḍâ'â

Ngèbâ toḍi' nyarè kolat

Ka kottha mellè jhubâdhâ

Pong ghi' oḍi' torè asolat

Lè ta' kasta bilâ pon sèdhâ

Ètalèya ètalèlokong

Èsanggherrâ' locot bhâi

Èsarèya dhika sèttong

Èbâ'-ambâ' lopot bhâi

Èpa jhâjhâ' kantha sapè

Ècangcang ta' èyènomè

Èkangajhâ' èkamèmpè

Èkaposang ta' ètemmonè

Anangghâlâ jhâ' pabânḍung

Mon bânḍung nangghâlâ polè

Asomajâ jhâ' paburung

Mon burung somajâ polè

Dhâmar tèra' sosro poter

Ta' kèra dhâddhi matèna

Jhâ' ra'-serra' ngoca' nèser

Ta' kèra dhâddhi lakèna

Tal-ontalan maèn bato

Lur-ghulurân amèn lèker

Abhâkalan ghi' bellun tanto

Bur-lèburân la mastè nèser