Minggu, 6 Maret 2022

TAGUR-365 (75)

***

Minggu iki acarane nekani resepsi ning Kryiad Hotel Purwodadi. Pak Bos alias Kepala Dinas Pendidikan Kabupaten Grobogan nembe mantu. Wah, mbayangke mesti rame banget. Lha rak tenan, lagi wae arep mlebu iku parkiran wis kebak. Akeh mobil jejer-jejer tekan ratan gedhe. Paling enak nggawa motor bisa nylempit tur ndelik ning pojokan, hehe.

Kagem Pak Bos mugi-mugi acaranipun lancar, mbak Joe dados keluarga sakinah, mawadah, lan warrohmah. Pengen ngerti ceritane dina iki?

Dina iki mau, aku lan kanca-kanca pada janjian mangkat jagong. Jam sewelas kudu tekan nggone. Pisanan tekan kono mau Kak Lestari. Wis WA barang ngenteni ning ngisor wit. Disusul Kak Isna terus aku teka. Isih ngenteni Kak Farida, biasa wonge ki dandane suwe dadi ora tekan-tekan.

Kanca komplit terus antri mlebu panggonan resepsi. Nglebokke tanda tresna entuk tanda mata terus antri mlebu. Panggih Pak Bos kaliyan Bu Ketua AGPG, salam-salaman terus iki sing ditunggu-tunggu, maem bareng.

Njupuk es jus ditambah sup matahari, rasane kok durung marem. Tak tambahi es krim, dadi kelingan jaman mbiyen. Mulih sekolah panas-panas nyegat es tung-tung, saiki dijenengke es krim iku.

Leren sedhelok mbi pakne terus ketemu Bu Tri Puji. Wah, dadi suwe ngene iki terus tambah nasi becek. Walah kok dadi akeh mangane. Wis cukup tekan semono thok, wis ora nambah meneh.

Senenge dina iki mau. Nekani resepsine Pak Bos kaliyan Bu Ketua AGPG. Acarane mantu lancar, Mbak Joe kaliyan Mas Dican dadi keluarga ingkang Sakinah, Mawadah, lan Warrahmah. Aamiin YRA.

Salam literasi saking Grobogan.